Дарханы замыг өнгөрсөн оны зургаадугаар сарын 17-нд хааж, бүтээн байгуулалтыг эхлүүлсэн. Замыг хурдан хугацаанд ашиглалтад оруулахын тулд тав хувааж, таван компанид тендер зарласан. Нэгдүгээр багц, Баруун аймгууд руу явах уулзвараас Хармодотын даваа хүртэл 37.2 км авто зам. хоёрдугаар багц, Хар модотын даваанаас өргөн хүртэл 30 км нь хоёрдугаар багцад хамаарна. гуравдугаар багц, Урьханаас Сүмбэр хүртэл. дөрөвдүгээр багц, Сүмбэрийн уулзвараас, Цайдамын хөндийг хүртэл 45 км зам. тавдугаар багц, Цайдамын хөндийгөөс Дархан хүртэл 30.5 км авто зам байх юм. Гэвч өнөөдрийг хүртэл “Дархан-Улаанбаатар” чиглэлийн 224 км зам ашиглалт ороогүй, овоолсон шороо, чулуу л байна.

Энэ замын ажил энэ сард эхэлж, зургаадугаар сард ашиглалтад орохыг Зам тээврийн хөгжлийн сайд Б.Энх-Амгалан хэлж байсан. Гэвч дэлхий нийтэд тархсан шинэ төрлийн коронавирусийн халдвараас урьдчилан сэргийлж, Монгол Улс хилийн хориг тавьж, зарим төрлийн үйл ажиллагаандаа хязгаарлалт хийсэнтэй холбоотойгоор Дарханы замын ажил хойшилжээ. Учир нь “Улаанбаатар-Дархан чиглэлийн замын бүтээн байгуулалтад ажиллах 105 ажиллах хүчнийг чартер нислэгээр татаж авах талаар ЗТХ-ийн сайд Б.Энх-Амгалан мэдээлж байсан. Тэд Монголд ирэхээсээ өмнө буюу БНХАУ-д байхдаа шинэ коронавирусийн шинжилгээгээ өгч, Монголд ирээд хөдөлмөрлөх эрхээ авахаа төлөвлөөд байсан юм. Гэвч Улсын онцгой комиссоос эдгээр иргэнийг авах хугацагаа хойшлуулсан. Ингээд Дарханы зам ажил эхлэхгүй дараагийн зунтайгаа золгох нь бололтой.

ДАРХАНЫ ЗАМ ШОРООН ЗАМАА БҮРЭН ТЭГШЛЭЭГҮЙ, ОН ДАМНАН ХОЙШЛОГДСООР ӨНӨӨДРИЙГ ХҮРЛЭЭ

Энэ авто замаар өдөрт дунджаар 5800 тээврийн хэрэгсэл зорчдог. Харин амралт зугаалгын үеэр 12.300 тээврийн хэрэгсэл зорчин өнгөрдөг гэсэн судалгаа бий. Иймээс Монголын хамгийн эрчимтэй хөдөлгөөнтэй замд тооцогддог. Энэ чиглэлийн замыг дөрвөн эгнээтэй болгож бүрэн ашиглалтад оруулахад ахиад нэг жил болох юм шиг байна.

Хуучин замыг нь хуулсан боловч ажил нь зуун задгай бүтэн жилийн нүүрийг үзсэн. Энэ чиглэлийн замыг хааж, түр замаар зорчуулсан хугацаанд зам тээврийн осол нэлээдгүй гарч 16 хүн амь насаа алдаж, 70 орчим хүн гэмтэл, бэртэл авсан гэсэн тоон судалгаа бий. Одоогийн байдлаар машин техник хэрэгслээрээ хохирсон 200 гаруй иргэн байгаа. Там болж арзайж сэрийсэн, овойж шовойсон чулуутай шороон замаар хэдий хүртэл явахыг бид таашгүй.

Уг нь ЗТХ-ийн сайд Б. Энх-Амгалан 2019 оны арваннэгдүгээр сард Дарханы зам ашиглалтад оруулна гэж хулхидсан. Бодит байдал дээр Дарханы зам ашиглалтад орох нь байтугай шороон замаа бүрэн тэгшлээгүй, он дамнан хойшлогдсоор өнөөдрийг хүрч байна. Энэ чиглэлийн авто замын ажил хэзээ эхлэх нь тодорхой бус байна.